विराटनगर,२५ चैत । नेपाल सरकारले नागरिकहको स्वास्थ्य उपचारका लागि ल्याएको स्वास्थ्य वीमा कार्यक्रम विश्वमा सबैभन्दा न्यून रकममा स्वास्थ्य सेवा भएको सहभागीहरुले बताउनु भएको छ ।
स्वास्थ्य वीमा वोर्ड कोशी प्रदेशद्वारा ‘स्वास्थ्य सेवामा सर्वव्यापी पहुँचका लागि स्वास्थ्य वीमा’ आठौँ स्वास्थ्य वीमा वार्षिकोत्सवको उपलक्ष्यमा आज यहाँ आयोजित कार्यक्रममा सहभागी वक्त्ताहरुले स्वास्थ्य सेवा संस्थाले सहज र सरल रुपमा सेवा प्रवाह गर्नुपर्ने तथा वीमितले समेत अनावश्यक स्वास्थ्य परीक्षण गरी सेवाको दुरुपयोग गर्न नहुने धारणा राख्नु भयो ।
उहाँहरुले राज्यले धेरै ठूलो अपेक्षा राखि शुरु गरेको यस कार्यक्रमलाई हामीसबैले सफल गरी संरक्षण गर्नुपर्ने बताउनु भयो ।
हाम्रो अस्पताल विराटनगरका प्रमुख डा. शंकरप्रसाद अधिकारीले स्वास्थ्य वीमा कार्यक्रमले न्यूनतम रकममा अधिकतम स्वास्थ्य उपचार सेवा प्राप्त हुने भएकोले सम्पूर्ण नागरिकले वीमा गर्न आग्रह गर्नु भयो ।
वोर्डका प्रदेश संयोजक अर्जुन पण्डितले वोर्डले मुलुकभरी गत वर्ष १६ अर्व र चालु वर्षको आठ महिनाको अवधिमा चार पटक गरी रु आठ अर्व सेवा प्रदायक स्वास्थ्य सेवा संस्थालाई भुक्तानी गरेको जानकारी दिनु भयो ।
कार्यक्रममा स्वास्थ्य विमा कार्यक्रम लागु गर्ने विभिन्न स्वास्थ्य संस्थाका प्रमुख एवं प्रतिनिधिहरुको सहभागिता रहेको थियो ।
सोही अवसरमा विराटनगर–३ कि उत्कृष्ट वीमा दर्ता सहयोगी विमला खनाललाई सम्मान गरिएको थियो ।
प्रदेशमा कूल विमित परिवार सङख्या चार लाख ४४ हजार ९११, कूल विमित जनसङख्या २३ लाख नौ हजार ८५५ जना(४७ प्रतिशत) , सेवा लिनेको वीमितको सङख्या ११ लाख तीन हजार ४३४ जना (४८ प्रतिशत) र नविकरण गर्ने वीमितको सङख्या ७७ दशमलव २९ प्रतिशत रहेको वोर्डद्वारा उपलव्ध तथ्याङकमा उल्लेख गरिएको छ।
प्रदेश वोर्ड अन्तर्गत सरकारी ८०, सामुदायिक चार र नीजि २२ गरी १०६ सेवा प्रदायक स्वास्थ्य संस्था आवद्ध रहेका छन् ।
हालसम्म नेपालमा ७७ लाख ४१ हजार ४५३ जना( २२ दशमलव ५४ प्रतिशत) नागरिक स्वास्थ्य वीमा कार्यक्रममा आवद्ध रहेका छन् ।
वोर्डले लक्षित वर्ग वाहेक स्वास्थ्य वीमा सेवाको दुरुपयोग रोक्नका लागि सेवा प्रदान गर्ने स्वास्थ्य संस्थामा जम्मा रकमको १० प्रतिशत भुक्तानी गर्नु पर्ने व्यवस्था रहेको छ।–––