विराटनगर,६ भदौ । नेपाल उद्योग वाणिज्य महासंघ कोशी प्रदेशको आयोजना तथा नेपाल कृषि बजार विकास कार्यक्रम सहजको प्राविधिक सहयोगमा उद्योगी व्यवसायीहरूका लागि शुक्रबार विराटनगरमा स्टार्टअप र नवप्रवर्तन सम्बन्धी अभिमुखीकरण सम्पन्न भएको छ ।
महासंघ कोशी प्रदेशका अध्यक्ष राजेन्द्र राउतको प्रमुख आतिथ्यतामा आयोजित अभिमुखिकरणमा मोरङ र सुनसरी जिल्लाका जिल्ला तथा नगर उद्योग बाणिज्य संघका अध्यक्ष, प्रतिनिधि तथा स्थानीय तहका अधिकृतहरू सहभागिता रहेको छ ।
अभिमुखिकरणमा उद्यमशिलताको अवधारणा, उद्यमशिलताको विकास, सफल उद्यमशिलता निर्माण गर्ने, उद्योग व्यवसाय क्षेत्रमा नवप्रवर्तनलाई अघि बढाउने लगायतका विषयमा छलफल भएको हो ।
नेपाल उद्योग वाणिज्य महासंघ कोशी प्रदेशका अध्यक्ष राउतले युवापुस्ताले आर्जन गरेको नयाँ सीप, उत्साह र प्रविधिको प्रयोग गर्ने क्षमता विस्तार गरी डिजिटल उद्यमशिलताको विकास गर्ने ठुलो सम्भावना रहेको बताउनु भयो । त्यसैका माध्यमबाट मुलुकमा नवप्रवर्तनको विकास गर्न सकिने उहाँले बताउनु भयो ।
उहाँले युवा वर्गलाई उद्यमशीलता र नवप्रवर्तनसँग जोड्न सके मात्रै कोशी प्रदेश रोजगारी सिर्जना हुने मात्र नभई लगानीको बृद्धि, स्थानीय समस्याहरूको समाधान र आत्मनिर्भर प्रदेश बन्ने बताउनु भयो ।
अन्तरक्रियाका माध्यमबाट कोशी प्रदेशको अर्थतन्त्रलाई परम्परागत सीमाबाट बाहिर निकालेर विविधीकरण गर्न सहयोग पुग्ने अध्यक्ष राउतले बताउनु भयो ।
त्यसैगरी स्थानीय समस्याको समाधान स्थानीय सोचबाट हुनसक्ने सम्भावनालाई सवै क्षेत्रले सहयोग गर्नुपर्ने अध्यक्ष राउतको भनाइ रहेको थियो ।
उहाँले स्वदेशी र विदेशी लगानीकर्तालाई आकर्षित गर्ने वातावरण तयार गरेर कोशी प्रदेशको तीव्र गतिमा प्रगति गर्ने बताउनु भयो ।
छलफलले स्थानीय सरकार र निजी क्षेत्र बीचको आपसी सहकार्य समेत बलियो बन्नेमा महासंघ विश्वस्त रहेको अध्यक्ष राउतले बताउनु भयो ।
अध्यक्ष राउतले कोशी प्रदेशलाई नवप्रवर्तन, उद्यमशीलता र समृद्धिको केन्द्र बनाउन अन्तरक्रिया फलदायी अवसर बनेको विचार राख्नु भयो ।
महासंघले यस्तै अन्तरक्रिया मेची औधोगिक करिडोरका स्थानीय तह र उद्योग बाणिज्य संघहरूसँगको समन्वयमा मंगलबार र बुधबार झापाको विर्तामोडमा समेत सम्पन्न गरेको छ ।
स्टार्टअप तथा नवप्रवर्तन सम्बन्धी विज्ञ निरज खनाल र अनिल पराजुलीले सहभागीहरूमाझ विषयवस्तुको बृहत सहजीकरण गर्नुभएको नेपाल उद्योग बाणिज्य महासंघ कोशी प्रदेशका कार्यकारी निर्देशक राधारमण भण्डारीले जानकारी दिनुभयो ।