विराटनगर,११ भदौ ः कोशी प्रदेश सरकारले अगामी असोज ३ गते संविधान दिवस दिवस भव्य रुपमा मनाउने निर्णय गरेको छ।
कोशी प्रदेश सरकारका मुख्यमन्त्री हिक्मत कुमार कार्कीको अध्यक्षतामा आज मुख्यमन्त्री तथा मन्त्रिपरिषदको कार्यालयमा बसेको बैठकले सविधान दिवस तीन दिन भव्य रुपमा मनाउने निर्णय गरेको हो ।
बैठकमा प्रदेश सरकारका सबै मन्त्रीहरु, सचिवहरू, सामाजिक क्षेत्रका संघसंस्थाहरूको उपस्थितिमा रहनु भएको थियो । बैठकले ५०१ सदस्य मूल समारोह समिति गठन गरेको छ ।
त्यस्तै असोज ३ गते संविधान दिवसलाई भव्य रुपमा मनाउने र तीन दिनसम्म विविध कार्यक्रमहरू गर्ने निर्णय गरेको छ ।
बक्तित्वकला प्रतियोगिता, स्वास्थ्य शिविर, प्रभात फेरि, झाँकी प्रदर्शनी, जिल्ला जिल्लामा प्रदेश सरकारका सेवाहरू देखिनेगरी कार्यत्रक्रमहरू गर्ने निर्णय गरिएको छ ।
सो अवसरमा मुख्यमन्त्री कार्कीले प्रदेशभित्रका सबै संघसंस्थालाई संविधान दिवस भव्य रुपमा मनाउन आग्रह गर्नुभयो ।
उहाँले प्रदेशका मौलिकताहरू झल्किने झाँकी र जातजातिका विशेषता झल्किने प्रदर्शनीहरू गर्न पनि निर्देशन दिनुभयो ।
आन्तरिक मामिला तथा कानुन मन्त्रालयको समन्वयमा कोशी प्रदेशमा संविधान दिवस मनाउने तयारी गरिएको हो ।–––