विराटनगर,१३ फागुन । दादुरा–रुवेला निवारणका लागि आज देखि कोशी प्रदेशमा खोप अभियान शुरु भएको छ ।
कोशी प्रदेशका स्वास्थ्यमन्त्री प्रदीपकुमार सुनुवारले विराटनगर–१५ स्थित जनविकास उच्चमाविमा आज महिला स्वास्थ्यकर्मीलाई खोप सामग्री हस्तान्तरण गर्दै अभियानको शुभारम्भ गर्नु भयो ।
मन्त्री सुनुवारले सरकारको लक्ष्य प्राप्तिका लागि अभियान सफल बनाउन सबैको सहयोग आवश्यक रहेको बताउनु भयो ।
उहाँले वालवालिकाहरु उच्च जोखिममा रहेकोले स्वास्थ्यकर्मीहरु ,स्वयंसेविका र स्वयंसेवकाहरु खोप अभियानमा उच्च मनोवलका साथ लाग्न आग्रह गर्नुभयो ।
मन्त्रालयका सचिव डा सुधा देवकोटाले खोप लगाउनबाट वालवालिका छुट्न नहुने बताउनुभयो ।
प्रदेश स्वास्थ्य निर्देशनालय धनकुटाका निर्देशक ज्ञानबहादुर बस्नेतले अभियान अन्र्तगत प्रदेशका नौ महिना देखि १५ वर्ष सम्मका आठ लाख ९३ हजार ९३४ बालबालिकालाई खोप लगाईने लक्ष्य रहेको जानकारी दिनु भयो ।
राष्ट्रिय अभियान आजदेखि देखि चैत ७ गते सम्म भएपनि प्रदेशमा चैत ३ गते भित्रमा लक्षित जनसङ्ख्यालाई खोप लगाई सक्ने जनाइएको छ ।
प्रदेशका तेहृथुम, मोरङ र उदयपुरमा आज खोप लगाउँदै अभियानको शुभारम्भ गरिएको छ भने अन्य ११ जिल्लामा फागुन १६ देखि २७ गते सम्ममा अभियान शुरुगरि चैत ३ गते भित्रमा सम्पन्न गर्ने लक्ष्य रहेको छ।
प्रदेशमा आठ हजार ३६६ खोपकेन्द्रमा १२ हजार ६१८ स्वास्थ्यकर्मीले खोप लगाउने कार्यमा सङ्लग्न रहने निर्देशनालयले जानकारी दिएको छ।–––