विराटनगर / निजी तथा आवासीय विद्यालय अर्गनाइजेसन नेपाल (प्याब्सन) कोशी प्रदेश समितिले बदलिँदो शैक्षिक परिवेश अनुसार विद्यालय सञ्चालन र नेतृत्व विकास गर्ने उद्देश्यले ‘निर्देशनात्मक नेतृत्वको आयोजना गर्ने भएको छ ।
आगामी मंसिर २६ गते सुनसरीको इटहरीमा उक्त एक दिने सम्मेलन सम्पन्न हुनेछ ।
सामाजिक र भावनात्मक सिकाइ अर्थात् ुविद्यालयमा दिगो नेतृत्व र भलाईु भन्ने मूल विषयवस्तुमा आधारित रहेर नेतृत्वको आयोजना गर्न लागिएको हो । विद्यालय नेतृत्वलाई दिगो, व्यावसायिक, समावेशी र भविष्यमुखी बनाउँदै विद्यालयलाई सुरक्षित र सिकाइ–मैत्री बनाउन सहयोग पुर्याउने उद्देश्यले कार्यक्रम तय गरिएको प्याब्सन कोशी प्रदेशले जनाएको छ ।
सम्मेलनमा कोशी प्रदेशका १४ वटै जिल्लाबाट करिब ३ सय जना विद्यालय सञ्चालक तथा प्रिन्सिपलहरूको उत्साहजनक सहभागिता रहने प्याब्सन कोशी प्रदेशका कोषाध्यक्ष प्रेमलाल सिंह सुवालले जानकारी दिए ।
समिटमा विद्यालय सुधारका विविध आयामहरूमा गहन छलफल र प्रशिक्षण हुनेछ ।
कार्यक्रममा मुख्य प्रशिक्षकका रूपमा कुमार थापा, अञ्जु भट्टराई, आयुष्मा रेग्मी र तनुश्री सिंह सहभागी हुनेछन् । त्यस्तै, मुख्य वक्ताका रूपमा प्याब्सनका केन्द्रीय अध्यक्ष कृष्णप्रसाद अधिकारी, प्रमुख सल्लाहकार डीके ढुङ्गाना, वरिष्ठ सल्लाहकार टिकाराम पुरी र केन्द्रीय तालिम विभाग प्रमुख सन्तोषमणि न्यौपानेलगायतले शिक्षाका विभिन्न आयाममा आफ्नो अनुभव र दृष्टिकोण प्रस्तुत गर्नेछन् ।
कार्यक्रमको संयोजन प्याब्सन कोशी प्रदेशका अध्यक्ष सुमित थापाले गर्नेछन् ।
अध्यक्ष थापाका अनुसार यो भव्य कार्यक्रम सम्पन्न गर्नका लागि करिब रु ३६ लाख खर्च लाग्ने अनुमान गरिएको छ ।
यो सम्मेलनले कोशी प्रदेशमा विद्यालय नेतृत्व विकास, शिक्षकको व्यावसायिक वृद्धि र समग्र शैक्षिक गुणस्तर सुधारमा नयाँ ऊर्जा थप्ने विश्वास लिइएको छ । शिक्षामा दिगोपन र नवप्रवर्तनलाई संस्थागत गर्न प्याब्सनले थालेको यो प्रयासलाई कोशी प्रदेशको शैक्षिक क्षेत्रमा एक महत्त्वपूर्ण सुरुआतका रूपमा हेरिएको छ ।—