विराटनगर १३ मंसिर । नेकपा एमालेको ११ औं राष्ट्रिय महाधिवेशन प्रतिनिधिका लागि शनिबार देशभर प्रतिनिधि चयन गरिदैछ ।
महाधिवेशन प्रतिनिधिका लागि मोरङमा अध्यक्ष केपी ओली समूह र बरिष्ठ उपाध्यक्ष इश्वर पोखरेल समूहवीच तीव्र प्रतिष्पर्धा छ । प्रतिनिधिसभाका ६ र दलित एक गरि ७ वटा निर्वाचन क्षेत्रबाट ४६ प्रतिनिधि चयन हुँदैछन् ।
मोरङ ५ बाट सवै ६ जना र मोरङ २ बाट महिला प्रतिनिधि २ जना सर्वसम्मत भएका छन् । सर्वसम्मत भएका ८ जनामा ६ जना पोखरेल समूह र २ जना ओली समूहका रहेको बताईएको छ ।
शनिबार ३८ प्रतिनिधिका लागि मतदान हुँदैछ । निर्वाचनमा ७६ जना समूहगत प्रतिष्पर्धामा छन् भने १० जना कुनैपनि समूहवीना प्रतिनिधि चयनका लागि प्रतिष्पर्धामा रहेका छन् ।
मोरङमा पोखरेल समूहले ओली समूहलाई टक्कर दिइएको पोखरेल समूहका एक नेताले बताएका छन् ।
ओली समूहले पोखरेल समूहले टक्कर दिने अवस्था नभएको दावी गरेको छ । सर्वसम्मत भएका ८ जनामा ६ जना पोखरेल समूहका भएकाले सो समूह उत्साहित बनेको छ ।
मोरङमा ओली र पोखरेल दुवै समूहले सामाजिक सञ्जालमा प्रचार सामग्री बनाएर ब्यापक प्रचार प्रसार गरिरहेका छन् ।
मोरङ ग्रामथानकी उपाध्यक्ष गुणावतीदेवी धामी ओली र पोखरेल दुवै समूहमा परेकी छिन् ।मोरङ ४ को महिला प्रतिनिधिमा उनलाई दुवै समूहले राखेका छन् ।
मोरङमा ४६ प्रतिनिधिमध्ये उनी मात्रै एक्लो उम्मेदवार रहेकी छिन दुवै समूहमा परेकी हुन ।
संविधानसभा सदस्य पर्तमान धिमाल, नगरप्रमुखहरु दिलप्रसाद राई, केदारप्रसाद गुरागाई सहित ४८ जनाले उम्मेदवारी फिर्ता लिएका छन् । प्रतिनिधिसभाका ६ र एक दलित गरि ७ वटा निर्वाचन क्षेत्रका ४६ जना प्रतिनिधिका लागि मंसिर ८ गते १४५ जनाले उम्मेदवारी दर्ता गराएका थिए ।
